Bulan Alaeun

anaking
usum tiris ngaheurap awak
abah siduru na rahuh ambu
ngotretkeun mangsi kana papasti
ku kalam nasib nu nyamuni

tuluy ambu
teu eureun ninun kulambu
dina sajak nu tingkelemeng
sawah baseuh jadi hiji-hijina sawarga
keur nandurkeun binih cinta

karasa lewang
kasengker gurilap pakarang
mangsi nu ngeclak jeroeun sajak
ngaguratkeun jirim jimat
lebah lolongkrang sedong karamat

tapi ambu
ngabebenah padalisan
saban surup ringkang bulan
beuki nyeumat kalangkang nyawa
na rohang-rohang ungkara

nyata anjeun anaking
cikahiyangan nu dipelak
na wirahma saban sajak
ngageclangkeun asih nu gumati
lebah gumeterna sirung diri

kiwari ambu
ngitung mangsa anjeun datang
saban abah nganyam siloka
rek ngajaul ka pakalangan
muru sajak nu can kajudulan

tapi anaking
isuk parahu kudu balayar
ka saban pulo nu ngajajar
nu murwakanti jeung dunga
nu sawarna jeung karumasa

http://kamayangan.blogspot.com
Dikutip ti urangsunda.net