Sanajan Bulan Nguliwed

Ditulis ku Ganjar Kurnia

I.

sabada

sekon demi sekon anu jadi kanteh menit

ditinun jadi jam;

jam ngajadi poe

poe jadi bulan

bulan ngabaju taun

awak nyangsaya (deui):

dina lalakon sorangan

II.

roh nu ditiupkeun

kana raga nu pinasti mapagkeun pati

ukur

kalangkang wayang kulit

dina layar belewuk :

kacaangan

lampu balincong kurang minyak -

katebak angin

III.

bumi muter -- jagat eundeur

kembang nu seungit kahibaran usum semi:

garing

kabeuleum heab panon poe usum panas

terus – murudul

geunteul

ngahodhod

katirisan

IV.

Poe terus ngagilinding

nyipuh buuk pulas kulawu

meotan kulit

maragas tulang

V.

Lalakon hirup

beku dina gelas waktu,

jadi layar

tempat lalajo mangyuta kalakuan

(anu ngerakeun!!!!)

VI.

Baranang paris

maragatkeun kasadaran:

poe teh,

laut tanpa tungtung

tempat pamayang balayar tanpa tujuan

poho ka pangbalikan

V.

Gusti,

Dina undakan waktu mapag ganti taun

Najan bulan nguliwed ngalelewe, kana

keclak cimata

jeung jangji anu remen dikedalkeun:

Kuring

ngitung mundur

mapag cahaya harepan :

sugan

enjing mah langkung bener

ti kamari

Pasihan kakiatan

Adzan Maghrib 31 Desember 2006

Di La Fontaine, 57 Paris

http://kamayangan.blogspot.com
Dikutip ti urangsunda.net